«رأيتُ بالمسجدِ طفلًا» موضوع انهاردة مش هحتاج فيه لمصادر؛ لأن اغلب اللي هقوله قد تكون أنتَ مريت بيه، حبيت نفصل شوية عن التلمود والحاجات دي ونركز في دينا شوية، ونعمل موضوع توعوي. دلوقتي في أغلب المساجد تلاقي الفئة المسئولة عن المسجد من فئة كبار السن؛ نظرًا بأنهم أصحاب خبرة كبيرة يعني، ولكن بنشوف عادات سلبية جدًا في الموضوع ده، هتكلم عن نقتطين أول نقطة مضرة لكل الفئات العمرية، وهي حبهم في توفير الطاقة، تلاقي في عز الصيف مش راضي يشغل تكيف او المرواح بشكل يحافط على المصليين، مع أن في أجواء كورونا دي بالذات لازم تخلي الهواء في المكان بشكل كويس عشان النفس ونقل الأمراض وغيره، تاني حاجة في برضوا في فئة من كبار السن لو شاف طفل داخل المسجد ممكن يمشيه بمجرد أنه طفل! أنا عارف أن نيته أنه يحافظ على صلاة المصلين التانين، ولكن هو مش من حقه يطلع طفل من المسجد فعلًا غير لما يكون مشاغب، أنما مبدأ المساوة في الظلم عدل في النقطة دي، ما هو إلا ظلم، لأن في أطفال هادية وبتكون رايحة تصلي فعلًا؛ حتى لو بيصلي غلط، من واجبك أنك تعمله يصلي صح أزاي، وبكده أنتَ المستفيد بحيث أن هو كل ما يصلي صح أنتَ هتاخد ثواب، وفي نفس الوقت حافظت على باقي المصلين، شوف أنتَ ممكن تفتح لنفسك باب حسنات أزاي؟ وفي حاجة تانية ممكن يكون طفل عنده شغف أنه يقف في أول صف، فطالما هو جاي بدري مخصوص عشان يصلي في أول صف مش لازم لما الصلاة تبدأ ترجعه ورا عشان واحد كبير يقف قدام، أنتَ بدل ما تحببه في الصلاة في المسجد هتخليه يفضل الصلاة في البيت، اهو هيصلي مطرح ما هو عايز، وممكن ميصليش أصلا، ونقطة كمان في الصلاة يكون مكان ضيق جدًا، يقوم باعت ولد صغير يصلي فيه، والولد مش عارف يصلي بسبب ضيق المكان، فتخليه متذمر طول الصلاة وتضيع صلاته، طب ما تسيبه هو واقف في المكان اللي هو واقف فيه من صباحية ربنا، أو طالما انت عايز تكمل الصف اقف انتَ واستحمل، أحنا المفروض نعمل على بناء جيل مثقف وهادف وعارف دينه مش عنده عقد، والتفاصيل الصغيرة دي بتأثر جدًا خاصة انه بيكون في مرحلة تكوين الشخصية، فلما تحكم على طفل هادي حابب انه يقرب من ربنا، بأنه يتحط في خانات المشاغبين، بمجرد أنه لسا متعلمش الصلاة الصحيحة، اللي هو أصلا من واجبك انك لما تشوف حاجة غلط وأنت عارف أنها غاط تصححها بدل ما تزود عدد المشاغبين واحد كمان. بس كده ده موضوع انهاردة اتمنى يكون موضوع لطيف عليكم، وقرائة ممتعة، ونأسف على تأخر الموضوع، إن شاء الله هيكون في تفاعل أكبر مننا🤍
