«فرسان الهيكل» فرسان الهيكل دول يا صحبي الجماعة الأقل سلكانًا على مر التاريخ واسم منظمتهم بالكامل الجنود الفقراء اتباع المسيح وهيكل سليمان، مالهم دول بقى يا سيدي؟ زي ما قولتلك ماشفوش ب3جنيه سلكان فتعالى نحكيلك قصة ازاي تسيطر على العالم في اقل من خمس دقايق. ترجع جذورهم التاريخية لبني اسرائيل، وهما من معتقادتهم ان هيكل سليمان في بيت المقدس وكان فيه مدرستين لتعليم الذكور والاناث وكانت مدرسة الذكور بتخرج كهنة وربانين الهيكل وعلية القوم، جه امبراطور روماني اسمه فسباسيان هدم الهيكل سنة 70م، تفرق الناس دول وراحوا لغرب اوربا وكان فيه الي بيخفي نسبه ودينه وخلافه. امتى بدأ تشكيل المنظمة؟ سنة 1118م سافر إلى القدس 9 فرسان من السلالة الاسرائيلية وعلى راسهم «هوج دي بايان، واندريه دي مونتبارد، والتقوا مع الملك بلدوين الثاني واللقاء ده انتهى بالأتفاق على انشاء جمعية بأسم الجنود الفقراء من اتباع المسيح وهيكل سليمان. وكان الهدف المعلن للمنظمة هو حراسة طرق الحج المسيحية من سواحل يافا إلى فلسطين وحماية الحجاج المسيحيين الجايين من أوروبا من قطّاع الطرق. وطبعا ده في فترة الحرب الصليبية الأولى بعد ما الحملة دخلت بيت المقدس فبعد السيطرة عليها سموها مملكة اورشليم اللاتينية وجعلوا من المسجد الأقصي هيكل الرب، ربنا ياخدهم، وكان حراس الهيكل دول اول 10 سنين مكنوش بيعملوا حاجة من الاهداف المعلنة لا دول كانوا بيحفروا تحت المسجد الأقصى؛ بحثًا عن هيكل سليمان والمقال الجاي هيكون عن الهيكل عشان حسيتك بدأت تووه. وتم الأعتراف بفرسان الهيكل سنة 1129 من الكنيسة على الرغم من انهم مش حابين ان الراهب والقسيس يبقى مُقاتل، وده كان شرطهم. وخد عندك بقى رسائل وتطبيل واللي يقولك فارس الهيكل قلبه ميت ميعرفش الخوف، بيتعشى شهامة ويحلي خوخ وحاجات كتير كده، وكان بيعتمد عليهم جدًا في الحروب الصليبية لقوتهم ومهارتهم العسكرية، وكان بيوصلهم فلوس كتير كتير اوي، لدرجة ان الملوك كانوا بيعينوا معاهم الفلوس ولو الملك مات يا بيرجعوها لأهله يا بياخدوها ومن هنا سبوبة حلوة أوي وفي سنة 1139 بقى مسموح لفرسان الهيكل انهم يسافروا اي بلد اوربي دون دفع ضريبة متدلعين يا صحبي وفي 1200 صدر مرسوم بينص على عدم خضوع الأفراد والأموال والبضائع داخل مقرات فرسان الهيكل ومنازلهم للقوانين المحلية الأوروبية. ويعدي ويمر سنين ويتحول اسم فرسان الهيكل لأسم الماسونية، مالك اتخضيت ليه؟ ما الماسونية ما هي إلا امتداد لفرسان الهيكل، ولكن لحد ما بقت ماسونية كانوا يمتلكوا قوة اقتصادية ضخمة جدًا، ونفوذ كبيرة في العالم، وقالوا عن نفسهم انها منظمة اخوية يتشارك افرادها عقائد وأفكار تخص الأخلاق. ولكن مصادر كتير بتقول ان هدف الماسونية هو السيطرة على العالم، واسهل طريقه للسيطرة على شخص انك تسيطر على اخلاقه وطباعه ومعتقداته، وحابب كمان اقولك ان الماسونية مش مجرد اسم بيتخاف منه، اطلاقًا دي معتقد ومشاهير كتير كانوا بيعتنقوا المعتقد ده واغلب اللي هيقرأوا المقال أكيد عارفين كونان دويل مؤلف شيرلوك هولميز، كان ماسوني! طيب هيسيطروا على العالم أزاي؟ من خلال حرب الجيل الخامس. اللي هي أيه حرب الجيل الخامس؟ اللي هي حرب السيطرة على العقول، حقيقي في منها نماذج ظاهرة هي نماذج تافهة شوية، ولكن مخيفة جدًا بالنسبالي، زي ظاهرة انتشار المهرجانات وانحدار الثقافة، دي تعتبر حرب ضد العقل والثقافة. الماسونية بثوراتها الماهولة قادرة تدعم مشروع ايلون ماسك لو تسمع عنه، والمشروع ده بينفذ فكرة فيلم اللمبي 8 جيجا على أرض الواقع، ولكن بشكل مرعب اكتر، خاصة ان الشريحة بتاعة ايلون ماسك هتبقى منضمة على شبكة وكل ما هو على شبكة يسهل اختراقه، تخيل تبقى خارج من بيتك مش بتقول غير يارب صبحنا وربحنا وبين هكراتك ما تفضحنا، عارف يعني أيه حد معاه تفكيرك؟ فكر في السؤال هتعرف هما أزاي بيحاولوا يسيطروا على العالم؟ قرائة ممتعة للجميع🤍
